Romans 11

Godira Isureri Ora Numiramajina

1'Enarena 'Ú Godiho Huni ehija pataarorahi'i ato'urumahane? Niho'o pana. Ijihuni maijaho na 'u'o Isureri ora Eparahami oni amuja ka'ene Penijimani oni amuja. 2Godiho mai'o ehwaha ka'ene nitama anejijino hena kimajaho paato'aruma'ena. Godoni ira vaji Iraija rona 'waramajaho ja runamiu raka? Iraijaho Isureri opuna'i chicha vene ijihuna'e Godoni siporua 'ona ijá 'wama

3Natohwe pu Oni poropetia mapokijija 'aniume tirahara. 'Ene pura tinia ka'ene Oni swasa vejujaho tiraku ranavara. 'Ena'omo iviamajai nanasumano hiju'ukame pu na 'ani'irono veju 'wamana.
4Eha ichá'ina'e Godiho huna venane?

Na ea mapoka (7,000) Peara nuana pavetihe 'ee nitupari pasatiura. Nuna'e 'ajohau'e hiju 'wamana.
5Iviamaa kakaho areri ija'ina renu. Ea 'aho'a Godira maiji vwihanie iji pijihana. 6'Ena'omo nú Godira maiji vwihanúajara reje nú Godoni ea rejara'e re'amajaho mamaa venareje rehuna pa'ana'e rehuna. Vejuro'i maiji vwihanúujaho maa pa'ana'e rehuna. 7'Enajihuna'e nú ichá 'wa'eja? Isureripo savujaho mai'o papiuname apejara. 'Enakaivo ea ka'ene Godira iji pijihajipo apejara. 'E'eju'e ea 'aho'ijija oja kikisima'ura rejara. 8Godoni ira vaji ea ka'ene oja kisina kajihi ronarena ija'ina 'waramana.

Godira pu vena'e pu niho'o pavwihane Hu pu nia ka'ene kiame ataaka mihajija pu niho'o pahena pakamuva'o roe iviasi veakino usevu 'wamana.
9Godoni ira vaji Tevitira ijá 'waramana

Puni 'iruma mai'o uneunecha 'aho'a kajihipo pu pisiviakame pu Godina'a niareri rena hiju rohuna. Puni uneunecha ka'ene maa kajipo pu pisimiakame pu hina pivusahi'i hihunijaho puni eha. 10'Ejakame puni niijaho niho'o nutuma navakame pu niho'o areri nia paniri'uhuna. Puni siseijara pu 'ahinavu'ukame majamano tútúpi arunamie ohuna 'wamana.
11Na kú'o 'waravu. Pu tachinamia kajara pu venakame Godi pu pataarorahune? Niho'o pana. 'Enakaivo pu siseaka veja kajihuna'e ariramaijaho puni nakijihipuni roume pu apejara. Jenitarupo ijí apejajihuna'e pu senama parahuna. 12Juapo sisea ka'ene vejajara reje ea ka'ene mwe'akino hijujija maranie 'ee pura pavejajara reje Jenitarua maraniana'e re'amajaho vo Juapo vea ka'ene Godoni kú'o 'unama ro'avari veijaho niho'o ni'ima'ura'e maranihuna.

Jenitaru Maraniajina

13'Enakaivo na ja ea ka'ene Jenitarua 'waravu. Na Jenitaru puni apasoru ijihuna'e na nuni kaukara kehuni arovua'e 'waravu. 14Nara Jua venakame pu Jenitaruapo raka ka'ene apejaji ura rena'e ariramaa ijí ape'avarono na 'unama savu. 15Godira Jua karaa ani irechami'i kaivo eaka mapoka ka'ene mwe'akaki hijujijahija venue 'unama roe Godi pu'úmo napura veju. 'Enakaivo túna'i Godira 'unama 'eka'amajaho pu areri ea kwamasahi'inapo 'urimaravu jarahuna. 16Oni ahaja amura Godi mahe akuavi'ina'e re'amajaho ahaja maho'o akuavi'ina'e rehuna. Icha tanapa kamara chinuma maa sa'amajaho icha maijaho anuama maa'e rehuna. 17Arivia 'aho'a kajipo anuama uri'usahe ariha ki'avajaho vu icha 'aho'a puni anuamijikano urimareje 'eka roe ijija ihenami'avara. 'Ejakame ijipuhipo marasahe arivia'e rehuna. 18Ja icha kajihuni anuama re'avarono Godira ja irechamianakúne ja kehi kehi pa'uraho'avara. Ijihuni maijaho ja icha kajihuni tanapijaho pana kaivo ja maijihuni anuama. 19Ja ijá 'wahuna Icha anuama kija tu'usahe ariha jihuna'e na ijí ihenamiara 'wahuna. 20Ijaho nimaa. Pu panimaa rojajihuna'e tu'usahe arihara. 'Enakaivo a nimaa ronujihuna'e a puni tinia apenana. Ja niho'o pakehi kehi 'urahe o'avara kaivo ijihuni hura veji'i hi'avara. 21'Enajihuna'e Godi ijí icha anuama nimaa kajihi pina pa'arena'ika'i 'uhuku ranama kaja'ina'e ja 'u'o ija'ina'e 'ahi'enakúne hami vwiha'avara. 22Ja niho'o hami vwiha'avara. Godi ea hami 'ahi'ine 'ee ea 'aho'a eha mihi'ina. Ijihuni maijaho ea ka'ene panimaa rojujija Hu niho'o hami pa'ahiu kaivo ja nimaa rone Huni arimai ijí vejujihuna'e Hu ja hami 'ahiuna. 'Enakaivo ja 'u'o panimaa ro'ipisa Hu ja 'u'o 'uhua ato'arumaa'a. 23'Ena'omo Juapo roe nimaa ro'avajaho Hu pu 'u'o 'eka'e ihehuna. Ijihuna'e Godi areri kú'o pu 'eka'e ihenahuna. 24Icha ka'ene ani'ini jihipuni anuamijiano 'eka roareje arivia kajihuni 'ahi ihenamiajaho Godi teamamana kaivo arivia kajihuna anuama maa ka'ene 'uri'usahe arihe kamino mwe'i navujihi 'eka kú'o arivia kajihuni 'ahi ihe'avajaho Godi teamama parahuna.

Godira Ea Maho'o Numiramajina

25'Ene vwehu nune ja hema ka'ene namuke hena ve'avarono 'waravu. Ijihuni maijaho ja Huni ea rejajihuna'e jarika pare'avara. Ijaho nimai Isureri ora ea pwinana'a oja kisina'e rene hi'eju'e Jenitarua roajiame Huni ea re para'eja'e iji'a Isureri mapoka nimaa rohuna. 26'Enareje Isureri ora maho'o Godoni ea rehuna. Godoni ira vaji vejaja'ina'e.

'Ene puni ni'ajihi'ina Saioni rena roe Jekaponi sisea 'eka ato'aruhuna. 27Ikaho raka ka'ene Na pu pu'úmo 'wame nimaa vejujina. Vea kajino Na puni sisea 'eke ruvahuna 'wamana.
28Núnijihuna'e pu ea mapoki jijahija Godoni vu'a maa maiu'ini jihuni naka rejara. 'Enakaivo Hu pu iji pijihe 'ee emahwaha nahama 'warama jihuna'e Hu majama oja mihu. 29Ijihuni maijaho Godira swara 'ee 'umenaujaho Hu kú'o pa'eka ruva'una. 30Ja nimarako Godoni ira pahene vejaja'ina'e pu Godoni ira hejura kaivo paveja jihuni hahi Hu ja numiramana. 31Pu iviamaa Godoni ira pahene vejaja'ina'e ja Godoni ira hene veju'e Hura ja numirama ja'ina'e pu 'u'o numirahuna. 32Godoni vwiha túchamaa ijaho ea maho'o Huni ira pahene vejujihuna'e Hu ea maho'o 'u'o numirahuna.

Godi Ta'arohu

33Godira ichá'ina ka'ene hena kama vwihanunaka ni'ima'uraka mavarasa'inijaho nú areri niho'o pahena pakavu. Hura 'unama ichá'ina'e uneunecha 'aho'a ve'iro 'ahaujaho nú niho'o pahena pakavura 'ee raka ka'ene Hura vehuna vwihanujaho nú areri pahena pakahuna. 34Godoni ira ika'ina 'warumana

Ea irara Natohwi jihuni vwiha hena kamo? 'Ee ea irara Hu vwiha ni'ajahe nahi'ina'e re'ena? 35Ea irara areri Godi iraka mahana'omo Godi kú'o ta'arohe ijí ea kajaho eha ma'ena 'úmana.
Niho'o pa'amaa. 36Uneunecha mapokakija Huni rene roara 'ee Huni vaji rejara 'ee maho'o Huna. Ijihuna'e nú Hu majama ta'arohuna. Ameni.